Әділет министрі Ерлан Сарсембаевтың айтуынша, өткен жылдың күзінде қазақстандық музыка Meta платформасынан жоғалып кеткен кезде, ұжымдық басқару саласындағы кемшіліктер анықталды.
«Көптеген танымал авторлар мен орындаушылар осы платформада олардың шығармаларын пайдаланғаны үшін төлемдерді алмай қалғандарын мәлімдеді. Сондықтан, бұл бағытты цифрландыру қажет. Авторларға және басқа құқық иелеріне онлайн форматында шығарманың пайдаланылу кезеңдерін: келісімшарттардан бастап, жинау, тарату және сыйақыларды төлеуге дейін бақылау мүмкіндігі беріледі», – деп атап өтті ведомство басшысы.
Сонымен қатар, жалпы цифрлық платформаны енгізу мәселесі, жасанды интеллект элементтерімен, аналитика және есептілік (мемлекеттік реестрлерге енгізілген объектілер бойынша), интеллектуалдық меншікке тіркелген объектілер бойынша іздеу жүйелерін жетілдіру, авторлар мен құқық иелері үшін мобильді қосымша әзірлеу, мемлекеттік органдар мен халықаралық ұйымдардың ақпараттық жүйелерімен интеграцияны кеңейту бойынша жұмыстар жүргізілуде.