Сыртқы істер министрлігінде БҰҰ-мен маңызды жобалардың дамуын талқылады.

Қазақстан Республикасының Сыртқы істер министрінің орынбасары Роман Василенко БҰҰ Даму бағдарламасының (БҰҰДБ) Қазақстандағы тұрақты өкілі Катажина Вавернямен кездесу өткізді.

Әңгіме барысында тараптар БҰҰДБ-мен ынтымақтастықтың қазіргі жай-күйі мен болашағын, соның ішінде өңірлік және екіжақты бастамалар аясында талқылады.

Р. Василенко БҰҰДБ-мен жергілікті өзін-өзі басқаруды дамытуға және ҚР мемлекеттік органдарына техникалық көмек көрсетуге бағытталған нақты жобаларды қаржыландыру бойынша ынтымақтастықтың маңыздылығын атап өтті.

Өз тарапынан К. Ваверня ынтымақтастықтың жоғары динамикасын құптап, ең маңызды бағыттар бойынша әрі қарай жұмыс істеуге дайын екендігін білдірді.

Кездесуді қорытындылай келе, тараптар екіжақты және көпжақты ынтымақтастықтың өзекті мәселелері бойынша диалогты жалғастыруға келісті.

БҰҰ Даму бағдарламасы Қазақстан аумағында әрекет ететін ең ірі БҰҰ агенттігі болып табылады. Оның қызметі 2021-2025 жылдарға арналған тұрақты даму мақсатындағы ынтымақтастық туралы келісім мен Елдік бағдарлама арқылы реттеледі. Елдік бағдарлама ынтымақтастықтың төрт негізгі бағытын қамтиды: әлеуметтік осалдық пен теңсіздікті шешу; мемлекеттік мекемелердің тиімділігін арттыру және есептілікті күшейту; экономикалық өсуді қолдау; климаттың өзгеруімен күрес және төмен көміртекті дамуға жәрдемдесу.