Қазақстан мен Еуроодақ адам құқықтары саласындағы маңызды реформаларды талқылауда.

Қазақстанның Бельгиядағы Елшісі Маргулан Баймұхан Еуропа Одағындағы адам құқықтары жөніндегі арнайы өкіл Олоф Скугпен кездесу өткізді.

Кездесу барысында Қазақстан мен ЕО арасындағы әртүрлі салаларда, соның ішінде адам құқықтары мен заң үстемдігі саласындағы ынтымақтастық мәселелері кеңінен талқыланды.

Қазақ дипломаты заң үстемдігін нығайту, азаматтардың құқықтарын қорғау және демократиялық институттарды дамытуға бағытталған саяси, экономикалық және әлеуметтік реформалар туралы өзекті ақпаратты ұсынды.

М. Баймұхан реформалар аясында «Қазақстан Республикасындағы адам құқықтары жөніндегі Омбудсмен туралы» Заңның, «Отбасылық және тұрмыстық зорлық-зомбылыққа қарсы іс-қимыл туралы» Заңның қабылдануын, саяси плюрализмді кеңейтуді және осал топтардың құқықтарын қорғаудың жаңа механизмдерін енгізуді атап өтті.

Конституциялық соттың рөліне және «тыңдайтын мемлекет» концепциясының маңыздылығына ерекше назар аударылды, бұл азаматтар мен үкімет арасында ашық диалогты білдіреді.

Тараптар ҚР Адам құқықтары жөніндегі уәкілінің кеңсесі мен ЕО адам құқықтары жөніндегі арнайы өкілінің арасында «ЕО-Қазақстан» және «ЕО-Орталық Азия» платформалары аясында тұрақты диалогтың перспективаларын талқылады.

Кездесудің қорытындысы бойынша Қазақстан мен Еуропа Одағы арасындағы адам құқықтары саласындағы ынтымақтастықты ілгерілету және азаматтық қоғамды дамыту үшін белсенді байланыстарды қолдау туралы келісімге қол жеткізілді.