Тоқаев Ұлттық банк басшысымен қаржы жүйесінің және валюталық нарықтың жағдайын талқылады.

Мемлекет басшысы 2024 жылы Ұлттық банктің ақша-кредит саясатын жүзеге асыру нәтижелері туралы есепті тыңдады және 2025 жылға арналған монетарлық реттеушінің жоспарларын қарастырды.

Президентке Қазақстанның экономикасы мен қаржы жүйесіндегі жағдай, бизнес белсенділігі, инфляция факторлары, сондай-ақ бағаларды тұрақтандыру және инфляцияның орта мерзімді 5% мақсатқа жету үшін қабылданатын шаралар туралы ақпарат берілді.

Қасым-Жомарт Тоқаевқа 2024 жылдың қорытындысы бойынша инфляция Ұлттық банктің болжамды диапазонында қалыптасып, 8,6% құрағаны туралы хабарланды. Осы орайда, Тимур Сулейменовтің айтуынша, сыртқы инфляциялық қысым артып, ішкі инфляциялық тәуекелдер сақталып отыр.

Мемлекет басшысына Ұлттық қордың активтері, алтын-валюта резервтері және БЖЗҚ-ның жағдайы туралы ақпарат ұсынылды. Атап айтқанда, 2024 жылы Ұлттық қор активтерін басқарудан түскен табыс 4,5 миллиард долларды немесе 7,5%-дан астамды құрады. Ұлттық банктің валюта резервтері 45,8 миллиард долларға жетіп, 27,4%-ға артты. Біріңғай жинақтаушы зейнетақы қорының зейнетақы активтерін басқарудан алынған инвестициялық табыс 3,4 триллион теңгені құрап, кірістілік инфляциядан 2 еседен астам жоғары болып, 17,8%-ға жетті.

Президент валюталық нарықтағы жағдай мен теңгенің тұрақтылығын қамтамасыз ету үшін жүзеге асырылып жатқан шаралар туралы ақпарат алды.

Сонымен қатар, Тимур Сулейменов банктік сектордағы тұрақты жағдай, депозиттік базаның тұрақты өсуі, қаржылық тұрақтылықты қамтамасыз ету үшін қабылданатын шаралар мен макропруденциялық саясаттың тиімділігін арттыру жоспары туралы баяндады.

Қасым-Жомарт Тоқаевқа Ұлттық цифрлық қаржы инфрақұрылымының даму нәтижелері мен Антифрод орталығының қызметі туралы да ақпарат берілді.

Кездесудің қорытындысы бойынша Мемлекет басшысы инфляцияны тұрақтандыру, Ұлттық банк пен Үкіметтің макроэкономикалық саясатын тығыз үйлестірудің маңыздылығын атап өтті, сондай-ақ Ұлттық банктің қызметі бойынша бірқатар міндеттер қойды.