Токаев Үкіметке басым бағыттарды дамытуға арналған кешенді шараларды әзірлеуді тапсырды.

Мемлекет басшысы отырысқа қатысушылар алдында сөз сөйлеп, Үкіметтің жұмысындағы негізгі бағыттарды анықтады: экономиканы әртараптандыру, инфрақұрылымдық дамудың жаңа деңгейіне көшу, цифрлық технологияларды жан-жақты енгізу, энергетиканы дамыту және ядролық кластер құру, агроөнеркәсіптік кешеннің әлеуетін нығайту, салық-бюджет саясатын реформалау, маңызды жобаларды қаржыландыру, сондай-ақ әлеуметтік қолдауды жүйелеу және денсаулық сақтау, білім беру, ғылымды одан әрі дамыту. Президенттің пікірінше, белгіленген міндеттерді жүзеге асыру үшін мемлекеттік аппараттың тиімді жұмысы қажет.

Шара барысында елдің әлеуметтік-экономикалық дамуы және ағымдағы жылға Үкіметтің жоспарлары туралы Премьер-министр Олжас Бектенов баяндама жасады. Фискалдық саладағы реформаларға қатысты ұсыныстарды Премьер-министрдің орынбасары – ұлттық экономика министрі Серік Жұманғарин ұсынды. Ақша-кредит саясаты мәселелері бойынша Қазақстан Ұлттық Банкінің төрағасы Тимур Сулейменов сөз алды. «Самрук-Қазына» қорының қызметінің нәтижелері туралы басқарма төрағасы Нұрлан Жақупов есеп берді.

Сонымен қатар, Астана қаласының әкімі Жеңіс Қасымбек, Шымкент қаласының әкімі Ғабит Сыздықбеков және Қызылорда облысының әкімі Нұрлыбек Налибаевтың баяндамалары тыңдалды.

Мемлекет басшысы Қасым-Жомарт Тоқаевтың толық сөйлеу мәтінімен осы сілтеме арқылы танысуға болады.